Por que precisamos da túa axuda?
A Orquestra Vigo 430 é unha asociación sen ánimo de lucro que traballa de forma independente ás entidades públicas para crear unha oferta cultural de calidade na nosa cidade e arredores. Por iso, buscamos outras maneras de financiación independentes dos organismos públicos.
Que ofrecemos?
Denominación de orixe galega
Contamos cunha plantilla de músicos amplia e maioritariamente de orixe galega (oito apelidos e todo)
Oferta cultural de calidade
Traballamos constantemente en crear unha oferta única e pouco común na nosa cidade, e con solistas tanto españoles coma de outros países con gran proxección internacional.
Labor pedagóxica
A través de proxectos como EscoitAntes e os concertos pedagóxicos que se realizan periódicamente no IES República Oriental do Uruguai, intentamos achegar a música clásica tanto a graduados en Hogwarts como a muggles.
Como podo colaborar coa orquestra?
A Orquestra conta con tres estratexias coas que podes colaborar connosco.
Indo aos concertos
Ao final achegarse a escoitar ós músicos é a maneira máis sinxela e pracenteira de colaborar connosco. E non nos importa que fagas fotos e vídeos: de feito, se nos etiquetades aínda mellor (@orquestravigo430). Sempre co móbil en silencio por favor.
Sendo Amigo da Orquestra
Ser Amigo da Orquestra ofrece vantaxes na compra de entradas, coñecemento previo das tempadas e a sensación de orgullo que aparece ao apoiar á cultura da nosa cidade.
Colaboracións e patrocinios
Estamos sempre abertos a escoitar novas ideas e colaborar con outras organizacións e empresas. Se queres colaborar ou patrocinarnos, ponte en contacto connosco por calquera das nosas canles de comunicación.
Patrocinadores
